Partidua arratsaldeko seietan hasiko da eta bi taldeek hurrengo partiduak prestatzeko baliatuko dute. Sarrerak 5, 10 eta 15 eurokoak izango dira.
Norgehiagoka polita ikusteko aukera izango da bihar 18:00etatik aurrera Ellakuri futbol-zelaian Laudio eta Athleticen artean. Aste honetan geldialdia izan da lehenengo mailako ligan, eta Athleticek datorren astelehenean La Rosaledan Malagaren kontra jokatuko duen partidu garrantzitsua prestatzeko. Athletic 5. postuan dago ligan eta aukera paregabea du sailkapenaren goiko aldean finkatzeko. Ernesto Valverdek minutuak emango dizkio gutxien jokatu dutenei eta filialeko jokalari batzuk era zelairatuko ditu. Gainera, aurrealdean probak egin ahal izango ditu, Aritz Aduriz zigortuta baitago Malaga eta Barçaren kontrako partiduetarako.
Laudiok, berriz, azken jardunaldian Atlético B taldeari irabazi eta jaitsiera-postuetatik atera ostean, lehenengo mailako talde baten kontra aritzeko aukera ederra izango du, datorren domekan Real Madrid C taldearen aurka jokatuko duten partiduaren aurretik. Une honetan Laudio 16. postuan dago hamalau punturekin, 2. B mailan dagoen aurreneko denboraldi honetan.
Lehenengo aldiz aurrez aurre
Harritzekoa eman dezakeen arren, Laudio eta Athleticek lehenengo aldiz izango dira aurrez aurre. Ez da, ordea, Athleticek Ellakurin jokatzen duen lehenengo partidua; izan ere, 2000. urtean, Araba Euskaraz jaiaren harira, Luis Fernándezek zuzendutako taldeak Aiaraldeko selekzio baten kontra jokatu zuen . Orduan Athleticek 0-3 irabazi zuen Santi Ezquerro eta Aitor Larrazabalen golei esker.
Asteazkenekoa, gainera, partidu berezia izango da, Unai Albizua laudioarra egongo delako Athleticen taldean. Albizuak azaroaren 3an Vicente Calderonen debuta egin zuen eta Ellakurin postu bat eskuratzeko erronkan beste pauso bat egin dezake.
Sarrerak, 5, 10 eta 15 eurokoak
Sarreren prezioa 10 eurokoa izango da preferentzian eta 15 eurokoa tribunan. Bazkideentzat 5 euroko prezio bakarra izango da eta umeek 5 euroko ordainduko dute preferentzian.