Udalbatzan gobernu-organoei zuzendutako galderak beranduenik jota hurrengo bilkuran erantzuten behartuta dagoela gogoratu dio Omniak Bilduri. Laudioko auzo-plataformak banatu berri duen prentsa-oharrean Tokiko Erakundeen Antolaketa eta Funtzionamendu Araudiak hala agintzen duela azpimarratu du.
Omniako zinegotzia behin eta berriro aurreko bilkuratan luzatutako galderak errepikatzen behartuta aurkitzen dela gaineratu dute. Erantzunik jaso ez duten hiru galdera aipatu ditu Nerea Gonzalezen taldeak.
Galderak
Omniak azaldutakoaren arabera, Laudioko etxegabeturen baten izenean ari da Udala negoziatzen. Auzo-ekimenak negoziaketa horretan Udalak darabiltzan botereak zertan diren eta prozedura zein helburuarekin gauzatzen ari den jakin nahi du, bai eta aferan interesa duten pertsonen nahiak kontutan hartzen ari diren.
Honez gain, Udalaren Lanpostu Zerrenda baloratzeko ikerketa ez duela oraindik jaso gogoratu du Omniak eta informatika alorreko mantentze-lanetarako kontratuaren inguruko galdera ere luzatu du: “zenbait zurrumurru iritzi zaizkigu. Zera jakin nahi dugu lehen eskutik: Zer ari da gertatzen kontratu horrekin?”
Urriaren 28ko Udalbatzan luzatutako erreguaren harira, alegia, orain arte Gobernu-batzordeak bideratutako kontratuak baliozkoak diren aztertzekoa, oraindik ez duela idatzizko erantzunik jaso salatu du Omniak: “Informazioa boterea dela jakin badakigu eta Omniako zinegotziaren lana ez dela erraztu nahi dirudi. Horregatik herritarrei guzti honen berri eman nahi diegu, hartara, Omniak luzatutako galdera eta erreguek erantzuna jaso dezaten eskura ditugun baliabide guztiak, legalak barne, erabiliko ditugula, zeren eta gure helburu bakarra demokrazia hobetzea baino ez delako, finean errealagoa eta parte hatzaileagoa izan dadin”.