Bilduk Omniak eta PSEk egindako kritikei erantzun die. Lehenak urriaren 28ko udalbatzan Gobernu-batzordeak kontratu publikoen inguruan erabakiak hartzeko aginpiderik ez duela adierazi zuen. Horren aurrean, gobernu taldeak salaketak egin aurretik ondo analizatu behar dela uste du. Izan ere, Omniak udalbatzari dagozkion konpetentziak errespetatzen ez direla esan zuen, 4 urtetik gorako kontratuak bertan ez ebazteagatik. Hala, Bilduk kontratu administratibo bat egiterako orduan zalantzak sortuz gero Kontratazio Administratiboko Kontsultarako Batzordera jo behar dela esan du.
Batzordea estatuaren organo bat da eta ezarritako legearen arabera 4 urte arteko kontratuak ebaztea alkatetzari edota entitate lokalaren lehendakariari dagokiola azaldu du gobernu taldeak. Gainera, kontratuei ezarritako luzapenak ez dira kontutan hartzen organo konpetentea zein den erabakitzeko. Horregatik, kontratazioak modu egokian egin zirela defendatu da udaletik, eta kritika horietan konponbidea baino ondorio mediatikoak bilatzen direla salatu.
Ondorio berdina atera dute PSEk azaroaren 25ean eztabaidatua izateko proposatutako moziotik. Bertan alokairu sozialetan aplikatutako igoeren aurka egiten da. Udaletik jakinarazi dutenez, alderdi sozialistaren ordezkariak hilaren 21ean ongizate sozialaren komisioan gai hori eztabaidatuko dela badakite. Gainera tasen igoeran akatsak detektatu ondoren, konponbidea aurkitu artean ordainketa guztiak izoztu zituztela jakinarazi dute.