Iragan den hilean Laudioko Udalak iragarri zuen Kultura Plana abiatu nahi zuela herrian dagoen bizitza kulturala modu eraginkorrean dinamizatzeko.
Planak helburu ugari jasoko ditu. Adibidez, euskara eta kultura euskalduna sustatzea. Aldi berean, etorkinen integrazioa landu nahi dute kulturaren bitartez, haien ekarpenak ere jasotzeko.
Planaren bidez esparru ezberdinetan sorkuntza ere bultzatu nahi dute, Oroimen historikoari ere bultzada eman nahi diote, baina ez bakarrik guda zibilari dagokionez. Dagoeneko existitzen diren kultur taldeen arteko elkarlana errazteko bidea bilatu nahi du plan horrek, baita belaunaldi berrien parte hartzea. Aipatutako azkenengo helburuen artean udal sailen arteko koordinazioa erdiestea eta antolatutako egitasmoen komunikazioa daude.
Hori guztia lortzeko metodologia partehartzailea erabili nahi du Bilduk. Eta horretarako kultur talde guztien ekarpenak ezinbestekoak direla argitu du. Horregatik teknikoak ez ezik kanpoko profesionalen beharra aurreikusi du eta Euskal Herriko Unibertsitatearekin harremanetan jarri da.
Gauzak horrela, aste honen bukaeran Laudioko Udalak eta hainbat eragilek EHUrekin bilera egin dute. Eragileen artean Durangoko Plateruena Antzokiaren kudeatzaileak eta Sopelako Udala daude. Herri hauek ere Kultura Plan berria lantzen ari dira eta.
Euskal Herriko Unibertsitateak badu master bat parte hartzea eta garapen komunitarioaren inguruan. Bileran elkarteek eta udalek azaldu zioten EHUri zeintzuk diren haien asmoak. Laudioren kasuan 6 pertsona etorriko dira Kultura plana egiten laguntzera. Guztiak ez dira Euskal Autonomi Erkidegokoak. Haien helburua diagnostikoa egiten laguntzea izango da.
Hitzarmena ez da oraindik sinatu baina adostasun zabala dute erakundeek, Natxo Urkixok esanda. Hitzarmena egiten dutenean zehaztuko dute zenbat ordaindu beharko duen Udalak Unibertsitateari. Dena den Udal ordezkariek ez dute uste diru asko izan daitezkeenik.