Hainbat dira erregulatu gabeko baratzeek okupatzen dituzten udal lurrak. Hauen erabiltzaileak nortzuk diren ez da jakiten eta erabiltzeari uzten dietenean oso zaila egiten da urteetan zehar pilatutako hondakinen garbiketa egitea. Horregatik, Udalak baratze hauek identifikatu eta inbentariatzea erabaki du.
Helburu nagusiak honako hauek dira: erabiltzaileak identifikatzea, baratzeen kokaleku zehatzak ezagutzea, erabiltzaile hauekin komunikazio zuzena izatea, baratzen erabilpen zehatzak ezagutzea, animalirik duten ala ez jakitea, baratze bakoitzaren ingurunea identifikatu eta deskribatzea (ekipamenduak...) eta zeintzuk abandonatu diren zehaztea.
honekin batera, erabiltzaileei eremu hauek errentan ematea debekatuta dagoela gogorarazten die Udalak, ezta abandonatzerakoan beste inori uztea ere, eta beharrezkoa dela une horretan Udalari jakinaraztea. Animaliak edukitzea ere debekatuta dago Osasun Sailaren arautegiaren arabera.
Oraindik ortu batzuk identifikatu gabe daude, baina hauek dira Udalak orain arte eskuratu dituen datuak:
- Larrako Arraño; 22 ortu, 9 identifikatuta eta 6 abandonatuta.
- Goienuriko Arraño; 14 ortu, 6 identifikatuta eta 2 abandonatuta.
- Santa Ana; 4 ortu, 3 identifikatuta eta 1 abandonatuta (aurten).
- Lateorro Ikastetxeko ingurunea; 30 ortu, 20 identifikatuta eta 3 abandonatuta.