Espetxean dituzten bizi-baldintzak salatu asmoz, Sevillako espetxean dauden euskal presoek gose greba hasi dute. Hamahiru presotatik hamaikak ekin diote bide horri. Horien artean aurkitzen da Manuel Gonzalez laudioarra. Gose grebara batu ez diren bi presoek bat egin dute borrokaldiarekin.
Sevillako espetxean muturreko bizi-baldintzak jasaten dituztela salatu du Etxeratek: “beti isolamenduko moduluan izaten dituzte; ez diete inolako aktibitaterik egiten uzten; patiora irteterakoan metal detektagailutik igaro arazteaz gain, ukimenezko miaketak egiten dizkiete gorputz osotik, noiznahi barrabilak edo zakila ukitzera helduz.” Gainera, miaketetarako biluztera behartzen dituztela gehitu du presoen senideen elkarteak. Senideek hainbat bisita galdu dituzte, haiek ere miaketak pairatu beharraren ondorioz.
197/2006 Doktrina
Manu Gonzalezek 24 urte daramatza preso. Ezarritako zigorraren arabera, pasa den urtetik kalean behar luke. Euskal Preso Politikoen Kolektiboko 55 kiderekin batera 197/2006 doktrina ezartzearen ondorioz bere espetxealdia luzatu egin zioten, ordea. Doktrina horren arabera, 2014an izango luke espetxetik irteteko muga. Hala ere, Estrasburgoko Giza Eskubideen Auzitegiaren azkeneko sententziak esanda, doktrinaren ezarpena legez kanpokoa da, eta, ondorioz, lehenbailehen kaleratua izan beharko litzateke. Kolektiboko kideek helegitea aurkeztu dute, Audientzia Nazionalaren erantzunaren zain daudelarik.