Laudioko Udalak iragarri du Kultura Plana abiatu nahi duela herrian dagoen bizitza kulturala dinamizatzeko. Udal taldearen ustez oso zabalduta dago Laudion jarduera kulturalik ez dagoela, “baina egutegiari erreparatuz, gauza asko antolatzen dira”, adierazi du Natxo Urkixo alkateak.
Plana Bilduren ideia izanik, lehenik eta behin, gainontzeko alderdiekin adostasun zabala beharrezkoa dela uste du. Hala ere, urrats ezberdinak emateko asmoa du koalizioak.
Abiapuntua, diagnostikoa
Natxo Urkixo alkateak uste du diagnostiko partekatua egin behar dela. Planak helburu ugari jasoko ditu. Adibidez, euskara eta kultura euskalduna sustatzea. Aldi berean, etorkinen integrazioa landu nahi dute kulturaren bitartez, haien ekarpenak ere jasotzeko. “Gaur egun inork ez luke esango trikitixa euskalduna ez den, baina XIX. mendean ekarri zuten Euskal Herrira langile italiarrek”, azaldu du alkateak.
Planaren bidez esparru ezberdinetan sorkuntza ere bultzatu nahi dute, Oroimen historikoari ere bultzada eman nahi diote, baina ez bakarrik guda zibilari dagokionez. Dagoeneko existitzen diren kultur taldeen arteko elkarlana errazteko bidea bilatu nahi du plan horrek, baita belaunaldi berrien parte hartzea. Aipatutako azkenengo helburuen artean udal sailen arteko koordinazioa erdiestea eta antolatutako egitasmoen komunikazioa daude.
Parte hartzea
Hori guztia lortzeko metodologia partehartzailea erabili nahi du Bilduk. Eta horretarako kultur talde guztien ekarpenak ezinbestekoak direla argitu du. Horregatik teknikoak ez ezik kanpoko profesionalen beharra aurreikusi du eta Euskal Herriko Unibertsitatearekin harremanetan jarri da.
Dena den, taldeen partaidetza izango da erabakigarria. Printzipioz, Kultura Kontseilua deitu eta bitartekoen kudeaketari eragingo dieten irizpide berriak azaldu dizkiete. Aurrerantzean, diru-laguntzetara -eta ez kontratazioetara- joko da taldeei babes ekonomikoa emateko. Bestalde, azpiegiturak uzteko prozedura egokiagoa prestatuko dutela aurreratu diote oinarria izango den Kontseiluari.