Bizirik jarraitzekotan, iragan astelehenean, urriak 14, beteko zituen 80 urte Gabril Aresti olerkigile entzutetsuak. Honako hau “aitzakiatzat” harturik Laudioko udalak, bere euskara alorretik, eta euskararen nazioarteko egunaren karietara, idazlearen omenezko jardunaldi batzuk aurrera eramatea erabaki du, azaroaren 28an hasita eta abenduaren 3ra bitarte. Ekintzen artean Andoni Egaña bertsolariaren parte-hartzea izango duen musika ekitaldia, Aresti ezagutu zutenekin mahai-ingurua, omenaldia… eta beste hainbat nabarmendu genitzake.
Arestik harreman estua izan zuen gure eskualdearekin eta baita Laudioko herriarekin ere, izatez, garai batean espainiar kolonia izandako Ekuatore Gineatik zura inportatzen zuen enpresa batean arduradun zen eta harreman estuak zituen Laudioko “Maderas de Llodio” enpresarekin. Aiaraldeari eta Laudiori eskaini zizkion olerkiak eta idatziak ez dira ez eskasak. Berea da, besteak beste, honako esaldi hau: “Laudio bat da eta lau dio”.
Bere pentsaeraren aldetik Aresti, abertzalea ez bazen ere (komunista ortodoxoa zen eta bere izaera klasezkoa zen eta ez hainbeste lurraldetasunezkoa), euskararen defendatzaile sutsua izan zen. Laudioko euskaldun gehienak bezala euskaldun berria, bere kaxa ikasi baitzuen Axularren hizkuntza, euskara batuaren lehen erabiltzaile literarioetako bat izan zelarik gainera.
Aresti, izatez, baserritik kalera jauzi egingo zuen euskara bat aldarrikatzen zuen (kalera noa ihesi), euskara garbi baino argiago bat, garbizalekeria sabiniarretatik at joango zena eta mundu modernoko beharrizanei aurre egiteko balioko ziona euskaldunari. Euskararen estandarizazioaren aldekoen artetik sutsuenetarikotzat har dezakegu, Txillardegi berarekin batera. Kuriosoki, Laudion kokatzen zen euskal garbizalekeriaren gotorleku nagusienetarikoa, JEZ enpresak kudeatzen zuen ikastolan. Bilbotik Laudioranzko trenean ez ziren eskasak izango Gabrielek eta ikastola honetako “andereñoak” elkarren artean izango zituzten eztabaidak.