2014rako ordenantza fiskalak adoste aldera, Bilduk aurreproiektua helarazi die talde politiko desberdinei. EAJk, bere aldetik, proposamen desberdinak egin ditu. Nabarmentzekoa da hainbat arlotan KPIaren izoztea eskatu izana, Bilduk proposatutako %2,7ko igoeraren aurrean.
Zehazki, Trakzio Mekanikodun Ibilgailuen gaineko Zergan, kotxeak kaletik kentzeko zerbitzuan eta hileta zerbitzuari dagokion tasan gertatu da hori. Hala ere, kultur etxeko ikastaroetan eta udal kirol instalakuntzen erabileran bat egin dute aurreproiektuko proposamenarekin, eta, beraz, %2,7a igotzearen alde agertu dira. Azkeneko horretan, ordea, ez datoz aldageletako armairuko giltza galdu edota apurtzearen ondorioz 15 euro ordaintzera behartuko lukeen legearekin bat, hori irabazi nahia dela argudiatuz.
Ondasun Higiezinen gaineko Zergari dagokionez, Arabako Foru Aldundiarekin hitzartutako %30a egoera ekonomikoak hobera egiten duenerako atzeratu behar dela uste du EAJk. Hala, Bilduk proposatutako %25aren aurrean, jeltzaleek %24an mantentzearen alde egiten dute.
Kale hondakin solidoen garbiketa zerbitzuan, aldiz, bi talde politikoen arteko aldea handitu egiten da. Bilduk %10a proposatu duen bitartean, EAJk %2,7a aldarrikatzen du. Izan ere, hauen ustez, ez da etxe ekonomia zigortzeko garaia, ezta tamaina guztietako enpresen gaineko presio fiskala handitzekoa ere.
Hobarien atala
Aipatutakoez gain, atal berria proposatu du EAJk: hobariak. Zerbitzu Soziokulturaletako arloak antolatutako kurtsoetako ikasleentzat zuzendutako atala da. Idatzian, 2 urtez baino gehiagoz Laudion erroldatuta dagoen ikasleari tasak %40a murriztea proposatzen du alderdi jeltzaleak. Gainera, baldintza hau betetzen duten langabetuei nahiz kide anizdun familiei %10eko murrizketa ezartzea aurreikusten da. Alargunei, berriz, %20koa.