Kontzertuak soilik ez, bestelako ekintzak ere antolatzen dituzte Orbeko etxea baserri okupatuko kideek. Horren seinale dira ostiral honetarako prestatuak dituzte errepresioaren kontrako jardunaldiak.
Arratsaldeko zazpietan hasiko dira jardunaldiak, COPELeko militante ohi Manoloren hitzaldiarekin. 1976an sortu zen COPEL, preso espainiar borrokalarien koordinadora, Carabancheleko (Madril) espetxean. Manolo preso zegoen garai hartan, “alfer eta gaizkileen legea” aplikatu baitzioten. Garai hartako bizipenak kontatuko ditu Orbekon. Ondoren, afari beganoa egongo da, 3 euroko bono laguntzaren truke.
Afariak antzerki emanaldiari pasako dio lekukoa gero. Michele Azamaren La esclusa antzezlana ikusteko aukera egongo da, Ana Plazak antzeztua. Obrak bi errepresio mota ditu ardatz: preso izategatik jasaten dena eta emakumea izategatik pairatzen dena.
Ostiralean Orbekora hurbiltzeko aukerarik ez duenak izango du jardunaldiez gozatzeko aukera ere; larunbatean, Zarautzeko Musika plazan dagoen Arrano tabernan.