Bihar, irailak 30, egingo da Laudioko bertso eskolaren aurkezpen ekitaldia, Herriko Plazako hitzaldi aretoan, 17:30etan. Eskolaren nondik norakoen gaineko zalantzak argitzea izango da aurkezpenaren xedea. Hala ere, antolatzaileek ikasturtearen gaineko hainbat informazio zabaldu dute dagoeneko.
Bi talde egingo dira bertso eskolan. Lehena, aurten 10-14 urte beteko dituztenetzat. Talde hori astero ordu betez arituko da bertsotan. 16 urte edo gehiago dituztenek osatuko dute bigarren taldea, eta astero ordu eta erdiz arituko dira. Kurtsoa urritik ekainera bitartean izango dela ere gaineratu dute antolatzaileek. Ikastaroa noiz egingo den, baina, aurkezpenean zehaztuko da, bertaratzen diren guztien artean. Egunak ez, baina irakaslea nor izango den zehaztua dago jada: Unai Mendibil bertsolari amurrioarra.
Ikastaroa guztiz ireki eta dohakoa da, eta bertan parte hartzera animatu dute antolatzaileek (Laudio Udaleko Euskara arloa eta Arabako Bertsozale Elkartea). "Bertsolaritza eta euskararen uretan murgil daitezen gure ume eta heldu artistak, sormena bihotzetik mihira eramateko xedez".