Lanbide Heziketa Udal Ikastetxeko zinema areto nagusian aurkeztuko du Aiaraldea Komunikazio Leihoak "Laudio 1983: Ur eta elkartasun oldea" dokumentala.
Arratsaldeko 19:00etan irekiko dute aretoa. Sarrera eta DVD -biak batera- 3 euroren truke eskuragarri izango dira. Proiekzioa 19:30ean hasiko da.
Ordubete inguru iraungo du filmak eta uholdeek eragindako hondamendia ez ezik 1983ko abuztuaren bukaeran eman ziren elkartasun ekimenak ere landuko ditu.
Gertakarien lekuko izan ziren eta garbiketa zein berreraikitze-lanetan parte hartu zuten hainbat herritarrek bere testigantza eman dute: Juan José Ibarretxe, Pili Elortegi, Ziriako Molinuevo eta Rafa Isasi, besteak beste.
Proiektuaren helburua da gogoratzea 30 urte bete direla uholdeek Laudio txikitu zutela. Ezbehar hark 6 hildako eta ehunka zauritu eragin zituen herrian, kalte ekonomikoak izugarriak izan ziren, herria berreraiki behar izateraino.
Hildakoak, txikizioak, beldurra eta ezjakintasuna izan ziren nagusi 1983ko abuztuaren 26 eta 27an. Baina urak, eramandakoarekin batera, elkartasuna eta kidetasuna ere ekarri zituen herrira, oldeka ekarri ere.
Gazteentzako emanaldiak
Dokumentalak memoria kolektiboa sustatzeko helburua duenez, estreinaldi publikoa egin baino lehen Laudioko ikasleek hurbilduko dira Lanbide Heziketa Udal Ikastetxeak duen areto nagusira goizean zehar.
Estreinaldia on-line
Dokumentala aiaraldea.com web-atarian ere estreinatuko da igande arratsaldean zehar.
Ekarpenak egiteko aukera
Elkarteak liburua utziko du ikusleek bere ekarpenak egin ditzaten. Iritzia, testigantzak edo bizipenak jasotzea espero du Aiaraldea Komunikazio Leihoak.