ESTHER AÑIBARRO (Laudio) margolaria da eta "Mariren Argi Bilgarrian" erakusketan parte hartu du. Urte luze eman ditu artearen munduan eta proiektu horren inguruan mintzatu da.
Zer da "Mariren Argi Bilgarrian"?
Erakusketa ibiltaria da. Frantzian hasi da eta bere asmoa da Euskal Herri osotik mugitzea. Gaia berdina da margolarientzat, argazkilarientzat eta eskultoreentzat: Anbotoko Dama, hain zuzen ere.
Nola izan duzu erakusketa horretan parte hartzeko aukera?
Pascale Gilbert galerista frantsesa nirekin harremanetan jarri zen proiektuan parte hartzeko proposamena helarazteko. Proiektuan beste hainbat artistek lan egin dute: Zumetak, Bikondoak, Letamendik, Gonzalo Etxebarriak, Richard-ek, Leire Sainz de Ajak, Eskerrik...
Zein izan da zure ibilbidea artista gisa?
Nire ibilbidea oso luzea da. Erakusketa ugari egin ditut, bakarka eta kolektiboak. Sari asko eskuratu ditut eta epaimahai moduan ere ibili naiz, euskararen aldeko ekarpenak egin ditut Bizkaian eta Araban.
Bestalde, 29 urte eman ditut pintura irakasle moduan.
Etorkizunerako zeintzuk dira zure proiektuak?
Une honetan klaseak ematen jarraituko dut eta hori uztartuko dut nire bakarkako proiektu berriarekin, etorkizunean erakusketa egiteko.