Jende mordoa batu da gaur sakabanaketaren kontra Herrirak deitutako kontzentraziora. Pankartaren aurrean Pablo Gorostiaga eta Judit Uriarteren argazki bana jarri dituzte. 19:30ean hasi da mobilizazioa. Bertan izan dira, besteak beste, Julen Arzuaga EH Bilduko legebiltzarkidea, Maribi Ugarteburu Sortuko kidea eta Periko Solabarria. Pablo Gorostiaga eta Judith Uriarteren gertukoek hartu duten pankartan "Senidea izatea ez da delitua" leloa irakurri zitekeen.
Tentsio unea ekitaldian
Kontzentrazioa isila izan da eta ekitaldi batekin bukatu da. Ertzaintzak Pablo Gorostiagaren irudia eramateko saiakera egin du sakabanaketaren aurkako elkarretaratzea gauzatu den bitartean. Ekitaldia bukatzear zegoela Herriko Plazan sartu eta tentsio uneak izan dira. Natxo Urkixo alkateak eta senideak poliziarengana jo eta alde egiteko eskatu diote. Ertzainek presoen argazkiak erakustea legez kanpokoa dela argudiatuta Pablo Gorostiagaren argazkia kentzeko asmoa zutela esan diote. Natxo Urkixok Herriko Plazaren segurtasunaren ardura berea dela erantzun die.
Alkateak behin eta berriro eskatu die plazatik joatea eta poliziek bere aurka neurri legalak hartuko dutela erantzun diote. Alabaina ez dute inor identifikatu.
Etxerat eta Herrirak sakabanaketarekin amaitzeko garaia dela nabarmendu dute. Bestalde, Pablo Gorostiagak Zaballako kartzelatik besarkada eta esker sorta bidali du. Laudion bildutakoentzat atzo idnarberrituta atera zela esateko eskatu du.
Ekitaldiaren amaieran senideek ertzaintzak izandako jarrera salatu dute, aski dela esanez.
[video:http://www.youtube.com/watch?v=3aH5OYJxM-U&feature=youtu.be]
