Gardeako industriagunean dagoen Arza eraikinean “enpresen hazitegi” bat jartzea. Hori da Laudioko Garapen Agentziak proposatu duen proiektua. Eraikin horretako bigarren pisuko 158,67 metro karratu erabiltzea da asmoa, guztira 9 bulego egokitzeko.
Bulegoak tokiko enpresa sortu berriek erabiliko dituzte, sortu eta lehenego hilabeteetan, euren negozio ideia finkatu dezaten. Gelak 14 eta 17 metro karratu bitartekoak izango dira, eta ondorengo ekipamendua izango dute: mahaia, hiru aulki eta armairu bat. Horretaz gain, internet, telefono zein telebistarako konexioa ere izango dute.
Onartzeke
Espazioa egokitzeko egin beharreko obrak sei astetan bukatzea dute aurreikusita, eta 75612 euroko aurrekontua erabiliko litzateke. Baina horretarako ekimenak gainontzeko udal talde politikoen oniritzia jaso behar du. Datorren astelehenean aurkeztuko zaie proiektua taldeei, eta ekarpenak egin ahalko dituzte orduan eurek.
Obra egitea adosten bada, bulegoetako bat eskuratzeko baldintzak eta prezioak eta espazioaren erabilera arauak finkatzeari ekingo dio udalak.