Judith Uriarte, Pablo Gorostiagaren emaztea, hil da gaur. Laudioko Udal Taldeak prentsa oharraren bitartez salatu du Pablo Gorostiagak bere bikotekidea ikusteko baimen guztiak zituela eta hala ere agurtzeko garaiz ez duela ekarri zigor-erakundeak.
Hedabideek zabaldu dute presoak ostegunean jaso zuela baimena lekualdatzeko eta urte osoa eman duela bere emaztea ikusi gabe.
Bilduk sakabanaketak eragiten duen sufrimendua ere denuntziatu du eta gogoratu du Carlos Urquijok anekdotatzat jo zuela sufrimendu hori adierazpen batzuetan.
Elkartasuna
Koalizioak goraipatu du Judith Uriarteren "konpromiso sozial sendoa eta Laudioko zenbait mugimendutan egindako lana" eta samina eta elkartasuna adierazi dio bere lagun eta senideei, bereziki Pablo Gorostiagari.
Erreakzioak sare sozialetan
Politika eta giza eskubideen esparruan erantzunak izan ditu Pablo Gorostiagaren egoera. Txema Urkijo abokatu laudioarrak twitterren bidez adierazi du asko sentitzen duela zigor-erakundeak eragoztea Pablo Gorostiagari bere emaztea agurtzeko aukera. Gainera, azpimarratu du horrelako sufrimenduek ekidin daitezkeela eta ez dutela zerikusirik justiziarekin eta biktimen eskubideekin.
Bestalde, Julen Arzuaga eta Laura Mintegi EH Bilduko ordezkariek twitter ere erabili dute Pablo Gorostiagaren egoera salatzeko. Pernando Barrenak elkartasun mezua bidali dio Laudioko alkate ohiari.
Pablo Gorostiagaren egoera legala
Udal taldeak azpimarratu du Pablo Gorostiagak Egin egunkaria sustatzeagatik dagoela kartzelan 8 urteko zigorra betetzen. 600 kilometrotara dagoela eta indarrean dagoen legeriaren arabera 70 urte baino gehiago dituenez eta zigorraren 3/4 bete duenez aske egon beharko lukeela esan du Bilduk