Laudioko Udalak adierazi du Administrazioarekiko auzien epaitegiaren epaiaren aurka alegazioak aurkeztuko dituela. Gasteizko epaitegiak Pablo Gorostiagaren pregoia bertan behera utzi baitu kautelazko neurria erabiliz. Astelehenean bukatuko da epea alegazioak egiteko eta Udalak espero du neurria altxatzea.
Bitartean, Natxo Urkixo alkateak ziurtatu du legea beteko dutela eta Pablo Gorostiagaren pregoia ez dela irakurriko epaitegiak kontrakoa ez badu erabakitzen.
Pregoia egingo da
Bilduko ordezkariek gogoratu dute pregoian ez dela bakarrik testua irakurtzen. Ekitaldiak hainbat ekintza jasotzen ditu eta printzipioz egitaraua mantenduko da.
Dena den, Natxo Urkixok aurreratu du azken hitza Batzorde Paritarioak duela. Batzordea astelehenean elkartuko da eta pregoiarekin zer gertatuko den bere esku egongo da.
Bilduren balorazioa
Laudioko Udal Taldeak pregoiaren inguruan gertatutakoaren irakurketa politikoa zabaldu du. Lehenik eta behin "hiru legealditan Laudioko alkatea izan den pertsona ezagun eta errespetatu bat pregoilari izendatzeagatik halako jazarpen judiziala ematea" ez dutela ulertzen esan dute.
Bestalde, alkateak salatu du salbuespenezko prozedura judizial eta neurri desproportzionatuekin inposatu erabili dela eta "kanpo injerentzia" dela uste dutela. Geroago, Laudioko herriak erabakitakoa errespetatzea eskatu dute.
Bukatzeko, herritarrak deitu dituzte jaiak alaitsu eta kementsu gozatzeko eta Pablo Gorostiagaren senide eta lagunei agur bat bidali diete "egoera honek sortu ahal dizkien traba guztien gainetik Laudioko herriak pregoilaria aukeratzerako orduan agertu zien estimua jaso dezatela berriro ere".