Gasteizko Administrazioarekiko auzien epaitegiak erabaki du Pablo Gorostiagaren pregoia bertan behera uztea. Hedabideek adierazi dutenez Mónica Basurto epailearen ustez alkate ohiaren pregoiak terrorismoaren biktimen duintasunaren aurkako erasoa izango litzateke.
Horrela, epaitegiak estatuko abokatutzaren argudioak onartu ditu. Epaiak Pablo Gorostiagaren pregoia egitarautik kentzea agindu du. Aldi berean, debekatu egin du beste norbaitek bere izenean pregoia irakurtzea.
Kautelazko neurria
Pregoia hurrengo astean egin behar denez, epaileak ez du denborarik izan prozesu judiziala burutzeko. Beraz, bi aldeen argudioak entzun gabe hartu du erabakia epaileak, kautelazko neurriaren bitartez. Mónica Basurtoren aburuz, estatuko abokatutzaren jarrera bereganatuko ez balitz, erakunde horren helburu zilegiak ez lirateke beteko.
Babesa eta zilegitasuna
Bere epaia justifikatzeko Mónica Basurtok esan du Pablo Gorostiagaren hautaketak bere jarduerari "babes eta zilegitasun adierazpena" suposatzen duela. Carlos Urquijo laudioarrak jakinarazi zion EAEko Fiskal Gorenari alkatea ohiaren izendapena.