Laudioko Udalak hitzarmen berria sinatuko du Abertis enpresarekin laster. Ordezkariak dituzten taldeek akordio berriaren aldekoak dira eta Tokiko Gobernu Batzarrean onarpena eman bezain laster sinatuko da.
Hitzarmenak Abertisek bete beharko dituen konpromisoak jasotzen ditu. Alde batetik, urtero 3000 euro ordaindu beharko dio Udalari toki publikoa erabiltzeagatik. Gainera, telefono-operadore bakoitzeko 3500 euro gehiago eman beharko dio erakundeari. 25 urteko iraupena izango du hitzarmenak.
Antena zaharraren aldaketa
Abertisek araudi berria errespetatuko du eta antenak 12,5 metro baino gehiagoko neurririk ez du izango. Horretaz gain, Arrañoko auzokideen aldarrikapenari erantzunez antenaren kokapena ez da gaurkoa izango. Etxebizitzetatik urrunduko da antena berria eta gorago jarriko du enpresak.
Enpresak leku aldaketak suposatzen dituen gastuak bere gain hartuko ditu eta Udalak baldintza zorrotzak ezarri dizkio horretarako. Hitzarmena sinatu bezain laster 5 hilabete izango ditu Abertisek tresna guztiak kokapen zaharretik berrira mugitzeko. Horrezkero, 3 hilabete gehiago izango ditu desmuntatzeko kokapen zaharrean zegoen azpiegitura osoa -etxola, antena...-. Lan horietan sortzen diren hondakinaken kudeaketen erantzulea Abertis izango da.
Mugak
Ingurumenari dagokionez, Abertisek mugak izango ditu ibilgailuak erabiltzeko. Kasu oso berezitan igoko dira Arrañoko tontorreraino. Bestalde, Abertisek TDTrako eta sakelako telefoniarako baliatuko da antenaz. Tresnerian aldaketak egingo balitu, Udalaren baimena beharko luke.
Udal taldeak auzokideekin asanblada egin du dagoeneko akordioaren berri emateko eta haien lana eskertzeko.