Arabako Batzar Nagusiek akordio bat onartu dute zeinetan Laudio gehiago laguntzea eskatzen zaion diputazioari, "zor historikoa" bezala ezagutzen denaren harira. Akordioaren alde bozkatu zuten alderdi guztiek, PP ezik. Zehazki, hauek dira aldundiari eskatzen dizkioten puntuak:
*Laudion suspertze ekonomikorako plana abian jartzea, Arabako herrietatik langabezia tasa handienetarikoa duena delako.
*Aiaraldeko eskualde enplegu plana abian jartzea eta, horri lotuta, Laudioko tokiko enplegu mahaian “aktiboki parte hartzea”.
*Laudioko Udalarekin biltzea, aldundiaren finantziazio “konprometitu edo beharrezkorik” jaso ez duten proiektuen zerrenda bat egiteko. Proiektu horietatik gaur egun beharrezkotzat hartzen direnak finantzatzeko konpromezua ere eskatzen diote diputazioari.
*Aiarako Koadrilaren garraio, azpiegitura zein finantziazio gabeziak aztertu eta konpontzeko konpromezua.
*Kodrilako herrien arteko koordinazio eta elkarlan akordioak sustatzea, azpiegitura eta zerbitzu publikoei dagokionez.
*Laudioko Udalarekin elkarlanerako hitzarmen bat sinatzea, foru zerbitzuen kudeaketa koordenatua bermatzeko.
“Oso akordio garrantzitsua”
Koldo Zabala Laudioko zinegotziak adierazi du “oso akordio garrantzitsua” dela Batzar Nagusietan onartu dena, eta gaineratu du aldundiak udalarekin kontaktuan jartzea espero dutela, “gaur egun finantziaziorik ez duten proiektuek finantziazioa izan dezaten”. Zabalak salatu du diputazioak ez dituela hartutako konpromisoak betetzen, eta Lamuza Parkearen kasua jarri du adibidetzat: Parkea berritzeko 3 milioi euroko kreditua emango zuela esan zuen aldundiak, baina ez du bere hitza bete, “diru sarreren murrizketa dela eta”.