Gaurko Laudioko Udal Osoko Bilkurak gai anitz landu ditu. Horien guztien artean gatazkatsuena margoketei dagokiona izan da. PP eta PSE-EE taldeek kale garbiketaren araudia urratu dela argudiaturik mozioa aurkeztu dute. Testuan salatu dute Bilduk baimena eman zuela presoen aldeko murala egiteko araudia aintzat hartu gabe.
PPren ustez, muralaren edukia pertsona batzuentzat iraingarria da. PSE-EEk prozedura ez jarraitzea egotzi dio Bilduri. Bestalde, EAJk mozio alternatiba landu du. Jeltzaleen ustez eman den akatsa administratiboa da. Haiek murala gogoko ez izan arren, behin eta berriro azpimarratu dute Biktimen Legea ez duela urratzen.
Bilduk, aldiz, prozedura guztiak jarraitu dituela ziurtatu du eta ez dela lehen aldia gauzak horrela egiten direla aipatu du. Elkarte baten eskaerari erantzunez baimena eman ziotela berretzi baitute.
Mozioak bozkatu direnean, batak zein besteak ez dute babes nahikorik lortu. PPren eta PSE-EEren mozioaren aurka agertu dira EAJ eta Bildu eta EAJren mozioa jeltzaleek besterik ez dute babestu. Omniako ordezkaria gaur ez da Udal Osoko Bilkuran egon.
Dozena bat pertsona hurbildu da Udal Osoko Bilkurara muralaren alde egiteko eta Etxerateko ordezkari batek hitz egin du adierazteko mozioa dela eta minduta daudela. Hala ere, eztabaida guztian zehar ez da ia tentsio unerik eman.
Etxe kaleratuen inguruko ekimenak
Etxe kaleratzeei buruzko bi mozio jorratu dituzte alderdi politikoek eta gehiengoa alde agertu da bitan. EAJk landutako mozioan etxe kaleratzeak pairatu dituzten pertsonek gainbalio zerga ez ordaintzeko onartu da aho batez.
Bestalde, PSE-EEk aurkeztutako mozioak salatu du etxegabetuek ezin dutela erabili errenta aitorpena egiteko doako zerbitzua. Zerbitzu hau Arabako Foru Aldundikoa da.
Sozialistek eskatu dute zerbitzua etxe kaleratuei zabaltzea eta foru erakundeak pertsona hauek aurten kontratatutako zerbitzuak ordaintzea. EAJk argitu du azken puntu horretan ez zegoela ados sozialistekin -oso kasu zehatzetan ordaintzen baitute erakundeek horrelako zerbitzuak- eta beraz abstenitu egin da, PP bezala. Mozioak aurrera egin du PSE-EE eta Bilduren bozei esker.
KZ Gunea zerbitzua
Gaurko beste eztabaidagaia KZ Gunea izan da. Eusko Jaurlaritzak Laudion zerbitzua erdira murriztu du eta langile erdiak kaleratu ditu. PSE-EEren aburuz, Jaurlaritzaren asmoa zerbitzua ixtea da. Horren aurrean sozialisten proposamena da zerbitzua orain arte egon den moduan uztea.
EAJk goraipatu du KZ Guneak egindako lana baina haien iritziz zerbitzua egokitu behar da gaur egungo egoerara. Gero eta jende gehiagok internet konexioa duenez, beste ikuspegia behar du KZ Guneak.
Alderdien eztabaida ostean, Koldo Domarcok hartu du hitza. Horrek Laudioko KZ Guneko langile gisa dinamizatzaile lanak egin ditu. Behargin ohiaren aburuz, pena da gertatutakoa, gero eta ikastaro gehiago ematen baitziren Laudion; 2011n 777 ordu, 2012an 970 ordu eta 2013ko lehenengo sei hilabeteetan 546 ordu eman dira.
Mozioa onartu da PSE-EEk eta Bilduk alde bozkatu baitute. EAJk aurkako boza eman du eta PP abstenitu da.
Kontzertu ekonomikoa
Azken astetan eman diren eztabaiden harira EAJk kontzertu ekonomikoa defendatzeko mozioa aurkeztu du eta talde gehienek babestu dute ekimena nahiz eta ikuspegi ezberdinak dituzten.