I. Jardunaldi Antikapitalistak antolatu ditu Laudioko Gazte Asanbladak asteburu honetarako. Ekainaren 7an emango zaie hasiera, ostiralean. 18:30etan Pablo Hasel raperoak “olerki errezitaldi iraultzailea” eskainiko du. Ondoren, jardunaldietako lehen hitzaldiari emango zaio paso, 19:30etan. Bertan XXI. mendeko sozialismoa izango dute mintzagai Venezuelako Kontsulatuko kide diren Vanessa Elecheguerra eta Yolanda Rojas Urbinasek.
Ondoren, egunari bukaera emateko, Hasel berriz igoko da oholtzara, Sobieht taldearekin batera kontzertua eskaintzeko.
Egitaraua, baina, ez da ostiral gauean bukatuko, larunbatean Kubari buruzko hitzaldi batekin helduko baitzaio berriro. Irlan gertatzen ari diren jendarte eta ekonomia aldaketak eta herrialdearen aurkako gerra mediatikoa izango ditu mintzagai Jose Manzanedak. Besteak beste, Euskadi-Kuba elkarteko eta Cubainformación hedabideko kide da Manzaneda.
Eguerdi partean bazkaltzeko aukera egongo da, doako luntx batekin. Ondoren, gitarra doinuak zabalduko dira Gaztetxean, Amurrioko Alperrikako Bizien Jabe bikote akustikoak emanaldia eskainiko baitu. Ondoren, Elikadura Subiranotasuna bilakatuko da eztabaidagai, Laudioko Baratza elkarteko eta Galdakaoko Ortu Okupatuetako kideen eskutik.
Azken hitzaldia 19:00etan izango da, Laudioko Emaion Emakume Taldearen eskutik. Patriarkatua eta kapitalismoaren arteko erlazioa jorratuko da bertan. 23:00etatik aurrera Laudioko Amankomun eta Asturiaseko Arma-X taldeek joko dute, eta hala emango zaio bukaera bi eguneko egitarauari. Ekintza guztiak Gaztetxean izango direla jakinarazi dute Asanbladako kideek.
Hortaz gain, Sistema kapitalistaren aurkako borrokan indarrak batzea eta kontzientzia garatzea “geroz eta beharrezkoagoa” dela adierazi dute, Jardunaldien zergatia azaltzeko argitaratu duten esku-orrian. Hortaz gain, asanbladak igandero 18:00etan Gaztetxean egiten dituztela gogorarazi dute.