AGUSTINA CAMBERO (Salamanca, 1955) eta FRANCISCO BELTRAN (Malaga, 1946) dira gaur Espainiako Loteriaren saria jaso duten laudioarretako bi. Andaluziar Etxean bildu gara eurekin.
Albistea jaso berri duzue. Zer moduz?
A.C.: Poz handiarekin!
F.B.:1984 daramagu zenbaki berarekin. Bazen garaia, beraz!
Zer suposatzen du zuentzat saria irabazi izanak?
F.B.: Jubilatuak izanda, nola ez zaizu ondo etorriko?
A.C.: Nik hiru alaba ditut langabezian. Imajinatu zer ondo datorkigun sari hau jaso izana!
Hasi zarete jada zorion mezuak jasotzen?
F.B.: Oraindik ez. Mugikorra deiez betea dut, baina tira.
Latiorro zortedun auzoa dela diote.
A.C.: Bai, Extremadurako Etxean adibidez saria egokitu zitzaien. Baina hemen orain arte ez da halakorik jaso.
F.B.: Herriko beste hiru etxe erregionaletan (Galiziakoan, Castilla-Leongoan eta Extremadurakoan) egokitu izan zaie noizbait sariren bat. Bazen ordua guri egokitzeko! Gabonetako Zozketa itxaroten geunden, baina orain egokitu zaigunez askoz hobeto gaude.
A.C.: Hori da. Esaerak dioen bezala, “gehiago balio du eskuan duzun txoriak hegan dauden ehunkak baino”.