Maiatzaren 17an Galiziako Letren Eguna izango da, jai egun ofiziala Galizian. Hori dela eta, Laudioko Galiziar Etxeko kideek jardunaldi kulturalak antolatu dituzte, maiatzaren 11tik 25era. Hala azaldu du Etxeko kidea den Raul Rodriguezek Aiaraldea Irratiko Harian Magazinean.
Umeentzako marrazki lehiaketarekin emango zaie hasiera jardunaldiei, larunbatean 10:30etatik aurrera, Etxean bertan. Rodriguezen arabera, urtero geroz eta haur gehiago bertaratzen dira bertan parte hartzera, “pasaden urtean uste dut 140 egon zirela eta larunbat honetarako horrenbeste espero ditugu”.
Igandean antzerki emanaldi bat egongo da Gazteizko Galiziar Etxean, baina jardunaldien Laudioko jarraipenerako datorren asteko ostiralerarte itxaron beharko da. Jaialdi Euskal-Galiziar bat baitute prestatua Etxeko kideek egun horretarako. Jaialdia Herriko Plazan izango da, 12:00etatik aurrera, eta Itxarkundia eta Espalladoiro taldeak egongo dira bertan. Marrazki Lehiaketaren sari banaketa ere bertan egingo da. Jaialdi horretan Euskaldun eta Galiziarren arteko “konplizitate bat” ikusten dela dio Rodrigezek, “galiziar taldea harro sentitzen da talde euskalduna jotzen ikusten duenean, eta alderantziz”.
Jardunaldiei amaiera emateko, Roberto Vidal Bolañori buruzko hitzaldia egongo da maiatzaren 25ean, arratsaldeko seietan, Etxean. Hitzaldia antzerkigile galiziar horri buruzkoa izatea ez da nolanahiko erabakia izan, aurtengo Galiziako Letren Eguna bere omenez ospatzen baita. Horren harira, Rodriguezek aitortu du jendeari halako hitzaldietan parte hartzea kostatzen zaiola, baina halako ekintzen “publiko bat” daukatela.
Jardunaldi horiek ez dira Laudioko Galiziar Etxeak urtean zehar antolatzen dituen ekintza bakarrak. Santiago Egunean ere Herriko Plazan aritzen dira, Rodriguezen hitzetan. Eta duela lau urte Euskadiko Galiziar Eguna antolatu zuten herrian. Aurten, baina, Santurtzin ospatuko da.