Atzo egin zen Udal Osoko Bilkuran PSEk eta PPk iragarri zuten ez direla egongo gaurko antolatu den Jai Batzorde Paritarioan -non jaiak antolatzen dituzten elkarteek zein alderdiek ordezkariak dituzte-. Sozialistek aurreratu zuten bere jarrera erregu eta galderen txandan. Txaro Sarasuaren aburuz zezenketak pribatizatzea da Bilduren helburua. Bestalde, Jai Batzordean ibiltzen diren beste pertsona batzuen jarrera salatu zuen.
Erregu eta galderen ostean Paula Cuesta PPko zinegotziak galdetu zuen zer esan nahi zuen zehazki zezenketak pribatizatu nahi zituztela. Haserre, Natxo Urkixo alkateak eta Koldo Zabala Bilduko bozeramaileak erantzun zuten iruzur egin nahi ziotela eta ez zela horrelakorik planteatzen.
Hala ere, Paula Cuestak ere iragarri zuen bere alderdia ez dela agertuko gaurko bileran.
Jaiak antolatzeko batzorde polemikoa
Dena den, gaia Omniak plazaratu zuen lehenago erregu eta galderen txandan. Talde independientea batzordea lotesle izatearen alde daude eta horregatik galdetu zuen gaur Kultura Etxeko Arraño Aretoan egingo den bileraren eta udal taldearen jarreraren inguruan. Bilduk behin eta berriro adierazi duena errepikatu zuen, legalki ezin direla erabakiak hartu batzordean baina konpromiso etikoa dutela erabakitakoa bete dadin. Bada ez bada ere, idazkariak gogoratu zuen arauen arabera horrelako batzordeek ez dutela erabakitzeko eskumenik.