Laudioko Udal Osoko Bilkuran eztabaidatu diren gaiek adostasun zabala lortu dute gaur. PSEk, EAJk eta Bilduk "Tokiko Administrazioaren erreformaz" mozioa adostu dute. Testu honen bitartez salatu dute PPk prestatzen ari den erreformak 5.000 biztanle baino gutxiago dituzten udalerriek kolokan jarriko dituela eta 20.000 biztanle baino gutxiago dituztenek eskumen gutxiago izango dituztela. PP ezik, talde politiko guztiek, Omniak, PSEk, EAJk eta Bilduk testu honen alde egin dute.
Lanbide Heziketako Udal Ikastetxearen publikotasuna eskatu den mozioan nahiz eta talde gehienak ados egon, eztabaida piztu da. EAJko zinegotzia den Maider Basterrak leporatu dio talde sozialistari -beraiek aurkeztu dute mozioa eta- deskortesiaz jokatzea eta protagonismoa bilatzea, Eusko Legebiltzarrean dauden taldeak hori bera lantzen baitaude. Sozialistak asaldatu dira eta tentsio uneak egon diren arren azkenean, Omnia ezik, abstenitu baita, udalean ordezkariak dituzten alderdi gehienek mozioaren alde egin dute.
Saharako gatazka
Pasa den Udal Osoko Bilkuran bezala, ekintzaile saharauiei Marokok ezarri dizkion kartzela zigorrak salatu dira Laudioko Udal Osoko Bilkuran. Gaurko mozioa Askapena taldeak aurkeztu du eta aho batez alderdi guztiek babesa eman diote.