Opozisioan diharduten alderdiek aurrekontuak hobetzeko asmoa dute eta zuzenketa asko proposatu diote Udal Taldeari. EAJk, PSE-EEk eta Omniak bere ideiak adierazi dizkiote Bilduri hainbat esparrutan.
EAJ ziurrenik abstenituko da
Laudioko EAJren enmendakinek aurrekontuan 810.976,20 euroko eragina izango lukete. Iradokizun azpimarragarrienak arlo ezberdinetan sailkatu dituzte. Enplegua eta prestakuntza sustatzeko programan 90.000 euro gehiago erabiltzea beharrazkoa dela uste dute jeltzaleek.
Arza eraikineko ekipamendua hornitzeko 30.000 euroko partida eskatu dute eta inbertsio sailean Areta-Gardea ardatzean dauden kaleak asfaltatzea planteatu dute. Kirol azpiegiturei ere garrantzia handia eman diete. Gehienbat Ellakuriko atletismo aldagelak konpontzeari, Lamuza Granja Kiroldegiaren instalakuntzei eta San Martingo aldagelei. Aldi berean, Etxebarri baserria, Ugarteko plaza eta proiektu berrien erredakzioak jaso dituzte proposamen gisa.
Maider Basterrak eta Ziortza Sierrak beste eskaera batzuk bideratu dituzte, Gizarte Ongizate sailak 25.000 euro gehiago izatea nahiko lukete laudioar senideak laguntzeko krisialdi garain. Garrantzitsutzat jo dute, kudeaketari dagokionez, ekonomia-finantza bideragarritasun plana kontratatzea.
Ondorio moduan, EAJk nabarmendu du pasa den urtean ez bezala, Bilduk ahalegina egin duela bere ekarpenak jasotzeko. Baina, koalizioak egin dituen aurrekontuak ez dira haiek egingo lituzkeenak, beraz, ziurrenik abstenitu egingo dira.
Herritarrak ardatza izan behar dira
PSEren leloa izan da, enmendakinak aurkezteko unean, herritarrak oinarria izan behar direla. Horregatik, proposamen asko jaso dituzte. Lehenik eta behin, sozialisten aburuz funtsezkoak ez diren partidak kentzea proposatu dute (protokoloa, publizitatea, kontzertu pribatuak, udalbatzen grabaketa...). Dirua aurrezteko udalaren eraginkortasun energetikoa bermatzeko azterketa proposatu dute.
Inbertsioen aldetik, parke linealean komunak jartzea ezinbestekotzat jo dute, kiroldegia handitu eta hobetzeko partida sortu behar dela uste dute eta kaleak asfaltatzeko 63.000 euro bideratu behar direla azaldu dute. Politika sozialean etxegabetuak, langabeak -bereziki 50 urte baino gehiago dutenak- eta alargunak babesteko dirulaguntzak sortu behar direla adierazi du PSEk.
Lana sustatzeko 160.000 euroko programa iradoki dute. Honen helburua 50 urte baino gehiagoko langabeak, gazteak eta ezgaituak izango lirateke.
Omniaren neurriak
Omniak ere ekarpenak egin ditu. Nerea Gonzalezek ordezkatzen duen taldeak Stop Etxegabetxeak Aiarak protagonismoa izan behar duela adierazi du eta horretarako Udalak baliabideak jarri behar dizkiola azaldu dute. 15.000 euroko partida proposatu dute horretarako.
Partaidetza zinegotziaren profila sortu beharra aipatu dute berriro eta enpleguaren esparruan Udal enplegurako proiektua sortzeko iradokizuna helarazi diote Bilduri. Bestalde, enpresa eta ideia berriei dirulaguntzak emateko prozesu partehartzaileak eta profesionalizatuak abiatu behar direla uste dute.
Bukatzeko, Omniak La Milagrosako jolastokiaren estaldura eta Aretako Fabian Legorburu ikastetxeko sarreran dauden eskailerek konpondu eta irisgarritasun irizpideak bete behar dituztela adierazi du.