Hausnarketa kolektibo bat jarri du martxan Laudioko Gazte Asanbladak. Prozesuaren helburua herriko gazteriaren egoerari eta Asanbladak zein Gaztetxeak bete beharko lituzketen funtzioei buruz hausnartzea da, Asanbladako kideen arabera.
Hausnarketaren lehen pausu moduan, galdetegi bat zabaldu du Asanbladak herriko gazteen artean. Galdetegian Laudioko gabeziei eta gazteen interes eta kezkei buruzko galderak luzatzen dira, eta baita Gazte Asanbladaren eta Gaztetxearen ingurukoak ere.
Galdetegia betetzeko buzoiak herriko honako txoko hauetan daude jarrita: Lamuza Plazan, Porikiroldegian, Kultur Etxean, Ikastetxeetan, Liburutegian eta Sorgin eta Iratxo tabernetan. Hortaz gain, inkesten online bertsioa ere sortu dute, hemen klikatuz erantzun daitekeena.
“Gazteok inurri lanean” izeneko aldizkariaren lehenengo alea ere plazaratu dute Asanbladako kideek. Lehen ale horretan iaz egindako gazteen lokalei buruzko ikerketaren ondorioak jasotzen dira. Aldizkaria hemen irakurri eta jeitsi daiteke.
Galdetegiak betetzeko azken eguna otsailaren 15a izango da. Asanbladako kideek jakinarazi dute behin emaitzak jasota herriko gazteriarengan eragiteko estrategia berria pentsatzeari ekingo diotela. Horretarako Gaztetxeko kide ohiekin ere kontatu nahi dutela gaineratu dute. Hala, e-posta bat jarri dute kide ohien eskura, ahalik eta kontaktu-zerrenda handiena osatze aldera: laudiokogazteasanblada@gmail.com
Ekintzak
Otsailean zehar hainbat ekintza egongo dira Laudioko Gaztetxean. Hilabeteko egitaraua gaur hasten da gaueko hamaiketatik aurrera egongo den mozorro eta karaoke lehiaketarekin. 22an, aldiz, Guitar Hero txapelketan parte hartu ahal izango du nahi duen orok, 21:00etatik aurrera.
Gainera, Asanbladako kideek jakinarazi dute Gaztetxea osteguneko pintxopoteetan irekia dagoela eta bertan hainbat gauza topatu daitezkeela: futbolina, ping-pong-a, liburutegi soziala… Bukatzeko, martxoaren 8rako ere zerbait pentsatzen dabiltzala aurreratu dute kideek.
<iframe width="560" height="315" src="https://www.youtube.com/embed/gniy8GJ1He4?rel=0" frameborder="0" allowfullscreen></iframe>