Laudioko Udal Osoko Bilkurak mozio ugari landu zituen atzo. Guztiek ez zuten garrantzi berdina, baina batzuk tokiko esparruan eragina izango dute. Lehenik eta behin, alderdi guztiek babestu zuten orain arte "Hezkuntza, gazteria eta emakumea" deitu den udaleko arloari aurrerantzean "Hezkuntza, berdintasuna eta gazteria" deitzea.
Hirigintzan ondorioak izan ditzaketen bi mozio onartu ziren ere. Alde batetik Landetako eremuari eragiten dion berrikuskatzea eta bestetik Karmen kaleko zubia aldatzeko proposamena. Bereziki garrantzitsua da Karmen kalean egin daitezkeen obrak, hainbat proiektu geldirik baititu zubiaren gaur egungo egoerak. Obra garestia izango denez, EAJk zein PSEk eskatu zioten alkateari URA agentziarekin negoziazioak hastea berehala diru-laguntzak lortzeko.
Udal ortu ekologikoen araua, azkenean, onartu egin zen. Udal Osoko Bilkurak, gainera, adierazpen instituzionalak egin zituen. PSEk, Omniak eta EAJk menpekotasunak pairatzen dituzten pertsonen aldeko adierazpena sinatu zuten eta Bilduk ere aldeko boza eman zuen. PSEk eta EAJk uraren pribatizazioaren aurkako mozioa aurkeztu zuten ere eta Bilduren babesa izan zuten.
Omniaren proposamenak
Omniak testu ugari eraman zituen Udal Osoko Bilkurara eta gehienak ez zuten aurrera egin, gainontzeko taldeek, orokorrean, uste baitzuten batzordeetan landu behar zirela proposatutako gaiak. Hala ere, "mobbing" fenomenoaren aurkako mozioa Bilduk babestu zuenez, onartu egin zen.
Bukatzeko, tokiko esparruarekin harremana izango duten bi mozioek adostasun zabala lortu zuten. Batean EAJk eta PSEk proposatu zuten udal kontratazioetan klausaula sozialak gehitzea. PPk eta Bilduk alde bozkatu zuten.
Azkenik, Aroa Cerrada jeltzaleak landutako testua eztabaidatu zen. EAJko zinegotziak azaldu zuen gizarteratze mahai osatzeko deia hilabete baten buruan luzatu behar zela. Mahai honetan eragile sozialen eta alderdien partaidetzaren beharra azpimarratzen zen diru-laguntzak kontrolatzeko. Guztiek aldeko boza eman zuten Bildu ezik. Alderdi honen ustez, tresnak bikoizteko arriskua baitago.