PSE eta EAJ alderdiek bi mozio aurkeztuko dituzte elkarrekin biharko Udal Osoko Bilkuran. Lehengo mozioa langabezi prestazioa bukatzen zaien pertsonei zuzendutako PREPARA planaren ingurukoa da. Hala, mozioaren bitartez plana luzatzea eskatzen diote bi alderdiek gobernu zentralari.
Bigarren mozioa udalaren kontratazio publikoen ingurukoa da. Hala, mozio horren bitartez langabezian edo baztertze sozialaren arrikupean dauden herritarren kontratazioa errazteko klausulak bideratzea eskatzen diote bi alderdiek gobernu taldeari. Horreterako, pymak (enpresa txikiak) maximizatzea eskatzen dute, kontratazioa maximizatze aldera. Gainera,udalarentzako lan egiten duten enpresei herriko langabetuekin osatutako lan zerrenda-boltsa bat osatzea helaraztea proposatzen dute.
Mozio gehiago
Arestian aipatutako bi mozioak ez dira biharko bilkuran eztabaidatu eta bozkatuko diren bakarrak. PSEk, bere aldetik, beste bi mozio aurkeztuko baititu, eta EAJk beste bat. Mozioetako batean, PSE uraren pribatizazioaren aurka azaltzen da, eta Diputazioari eta Jaurlaritzari ere gestio pribatuaren aurkako jarrera azaltzeko eskaera bidaltzea eskatzen du. Bigarren mozioan, alderdi sozialistak plenoak grabatzeko sistema berri bat ezartzea eskatzen du, orain erabiltzen dena garestiegia dela iritzita. Hala, bilkurak internet bidez streaming zerbitzari baten bidez emititzea eskatzen du, modu horretan Udalak, dirua aurrezteaz gain, “gardentasunean" irabaziko duela argudiatuz.
EAJren mozioak, aldiz, gizarteratze mahai bat eratzea eskatzen dio udalari, “gehienez jota hilabete baten buruan”. Mahai horretan, ordezkari politikoez gain, pobreziaren eta bazterketa sozialaren aurka jarduten duten eskualdeko talde eta erakundeek hartuko lukete parte.