JOSE LUIS TIRADOk (Urduña, 1949) egurra lantzea gustoko du. Abenduaren 14etik abenduaren 22ra arte berak egindako lanak erakutsiko ditu Laudioko Kultura Etxean.
Noiz hasi zinen egurra lantzen?
Soldaduzka egitetik itzuli nintzenean hasi nintzen. Lehen ere zeozer egiten nuen baina ez neukan denborarik. Betidanik gustoko izan dut egurra lantzea. Txikitan, mendian hazi nintzenez, denbora tartetxo bat nuenean labanarekin hartzen nuen makila eta horrekin entretenitzen nintzen.
Erakusketan ikusgai egongo dira egin ditudan gauza batzuk, ez guztiak. Lan asko saldu ditut, beste batzuk oparitu ditut... Eta erakusketak egin ditut lehen ere. Araba Euskarazen egin nuen, Castron ere egon naiz... Nahikotxo mugitu naiz. Laudion ziurrenik ezagunak hurbilduko dira erakusketa ikustera, gustoko dute eta.
Hala ere, nik gustorago egiten ditut tailuak baserrietan. Armarri ugari ikusiko dira erakusketan. Kexaako konplexu historikoa zuran grabatu eta horrekin esekitokia egin dut, adibidez.
Autodidakta naiz, inork ez dit ezer irakatsi. Gustatuko litzaidake ikastea, hori bai. Laudion egurra lantzen duten gainontzeko pertsonekin harremana dut. Hemengo pertsona batzuek oso gauza politak egiten dituzte, baina ez dituzte erakusten, tamalez. Fidelek noizean behin erakusten du egindakoa.
Egin dituzun lanen artean, zein duzu gogokoena?
Ez dakit, zaila da esatea. Goikogane Mendi Taldearen armarria daukan makila erakutsiko dut... baina guztiekin egin dut lan handia.
Ezinezkoa da jakitea zenbat ordu behar ditudan makila bakoitza egiteko. Bi aste ematen ditut makila bakoitzarekin gutxienez eta egunero lau edo bost ordu. Jendeak orokorrean hori galdetzen dit, ea zenbat ordu eman ditudan makila bakoitza egiten.
Bestalde, egiten ditudan makila guztiak erabiltzen ditut eta noizbait mendira eraman ditut. Zuhaitzen ostoak, animaliak... horrelako gauzak lantzen ditut egurran.
Eta zer tresna mota erabiltzen duzu?
Erosi ditut. Hasiera batean labanekin eta bihurkin zorrotzekin lan egiten nuen, baina askotan zauritzen nintzen.
Dena den, zaletasuna da hau. Egun euritsu batean makila bat hartzen dut eta egun osoa eman dezaket horrekin lan egiten. Etxeko izkina batean esertzen naiz nire tresnekin eta primeran pasatzen dut. Gustora ematen ditut ordu horiek.