Benito Lertxundi euskal musikariak Laudion joko du urtarrilaren 11n kiroldegian. Udal taldeak kontzertuaren salneurria eztabaidatzea proposatu zuen azkenengo Udal Osoko Bilkuran eta gaiak hautsak harrotu ditu.
Bilduk ezik gainontzeko taldeek ez dute begi onez ikusi kontzertua egitearen ideia. Alderdi guztiek azpimarratu dute ez dutela ezer Benito Lertxundiren aurka, baina ekimenak suposatuko duen inbertsioa gehiegi da haien aburuz. Guztira, printzipioz, Benito Lertxundiren emanaldiak 18.000 euro inguru balio du.
Udal taldeak proposatu dituen salneurrien arabera -12 euro aurretik erosten bada eta 15 lehiatilan eskuratuz gero- 7.000 euroko galera egongo litzateke. Diru kopuru handiegia Omnia, PP, PSE eta EAJren iritziz. Juanma Ibarretxek, EAJren zinegotziak, adierazi du bere alderdiak oso gustoko duela Benito Lertxundi baina ez dagoela ados erabakiarekin. Gainera, Ibarretxeren ustez, horrelako ekimenak herriko jaietara mugatu beharko lirateke.
Koldo Zabala Bilduren bozeramaileak, haientzat ohorea izango dela Benito Lertxundi ekartzea ziurtatu du. Aldi berean, gogoratu du kultura inoiz ez dela gauza errentagarria eta kontzertuak suposatu dezakeen galera murrizten saiatuko dela nabarmendu du.
Benito Lertxundiren ibilbidea
Benito Lertxundi pertsona oso garrantzitsua da euskal kulturan. Ez Dok Amairu taldearen sortzailea izan eta Mikel Laboa edo Xabier Leterekin batera euskal kultura berreskuratzeari ekin zion. Proiektua bukatu zenean, bakarlari moduan jarraitu zuen lanean eta aurten "Oroimenaren oraina" diska kaleratu du. Azken lanaren aurkezpen bira bertan behera utzi zuen, ebakuntza bat izan baitzuen.