Atzo egindako Udal Osoko Bilkura luzea -ia lau ordu- eta emankorra izan zen. Goiza Santa Ana kultur etxearen kudeatzaileen aldarrikapenekin hasi zen. Omniak helarazi zituen haien kezkak udaletxera eta nahiz eta mozioa ez zen onartu, udalak konpromisoa hartu zuen ongizate gizarteko batzorde monografikoa egiteko Aretako nagusien etxearen inguruan.
Geroago, Isusi eta Santa Luzia auzoen ur-horniketa hobetzeko proiektua onartu zen. Hori bai, horrelako egitasmoek Foru Planaren diru ekarpena behar dutenez, gutxienez, 2015ean hasiko da obra.
Honen ostean, taldeek adostu zuten dagoeneko eraikita dauden etxebizitxetan igogailuak instalatzeko ordenantzaren hasierako onarpena. Koldo Zabala, udal tadearen bozeramaleak argitu zuen Laudion 60. eta 70. hamarkadetan eraiki zirela etxebizitza ugari igogailurik gabe eta honekin instalazioaren prozedura arintzen saiatuko direla ordenantza berriaren bidez.
Lanbide Heziketako Udal Ikastetxearen kudeaketa
Bukatzeko, PSE, PP, EAJ eta Bildu batu ziren Lanbide Heziketako Udal Ikastetxearen inguruko mozioa onartzeko. Zehazki, alderdi hauek berriro eskatuko diote Eusko Jaurlaritzari ikastetxe honen kudeaketa bere gain hartzeko. Laudiokoa da, dirudienez, Estatu Espainiar osoan dagoen udal ikastetxe bakarra, beste guztiak sare publikoaren barruan omen daude.