Labankada bat eman zion pertsona batek Laudioko gazte bati pasa den igandean, goizean, Arrigorriako jaietan. Laudioar honen lagun batek adierazi duenez, zaurituaren koadrilako kide batzuk beste pare bat pertsonekin eztabaidatu zuten. Ezer esan gabe, hirugarren pertsona batek eraso zuen Laudioko gaztea labana batekin.
Zaurituaren lagun honek bi gauza argitu nahi izan ditu hedabideek esandakoa zuzentzeko. Alde batetik, erasoa jaso izan zuen gazteak ez zuela eztabaidan parte hartu ziurtatu du. Berez, koadrila sakabanatua zegoen geltokira joaten ari ziren bitartean eta nahiz eta kuadrila berekoa izan, berak ez zuen inorekin eztabaidatu.
Bestalde, labankadaren ostean borroka motz bat egon zela azpimarratu du bere laguna. Hortaz, erasoa ez zen eman istiluaren erdian, ordea, istiluaren hasiera izan zen. Dena den, iturri honen iritziz, polizia berehala agertu zen eta ukabilkada bakar bat egon zen. Honekin, labankada koadrilen arteko borroka baten emaitza izan zela esan duen kontakizunari uko egin nahi du.
Zauri larriak
Erasotzaileak labana bularrean sartu zion laudioar honi, aorta arteriaren eta bihotzaren artean hain zuzen ere. Zaurituak Galdakao eta Gurutzetako ospitaletan ebakuntzak izan ditu eta 3 litroko odol-transfusioa behar izan du. Hori bai, printzipioz, nahiz eta bere egoera larria izan den, bere bizitza ez dago arriskuan.
Pertsona bat atxilotuta
Udaltzainek gizon bat atxilotu zuten Arrigorriagako geltokian erasoaren ondoren eta lekuko batzuk ezagutu zutelako. Orain Ertzaintzaren esku dago ikerketa.
Laudioko pertsona ezaguna
Ospitalean dagoen gaztea ezaguna da herri mailan Latiorroko Jai Batzordean parte hartzen baitu, aldi berean Soroak koadrilako kidea da ere.