Parte hartzeko ekainaren 20a baino lehen eman behar da izena
Hitzaldi eta lan-jardunaldi batzuk eskainiko ditu Udalak hilaren 21etik 27ra bitartean, Herritarren partehartzea XXI. mendean izenpean.
Demokrazia Zuzena XXI. mendeko gizartean izeneko tailerrarekin emango zaie hasiera jardunaldiei, ekainaren 21ean. Esteban Perez eta Javier Argote arituko dira hizlari lanetan. Lehena 1977ko Udal Kudeaketarako Alternatibako sustatzailea da. Bigarrena Arabako Kontsejuetako
Elkartearen (ACOA-AKE) presidentea.
Ekainaren 25ean, aldiz, baliabide elektronikoak hiritarren parte hartzean duten funtzioa izango da mintzagai. Nagore de los Ríos Eusko Jaurlaritzako Irekia zerbitzuko buruak dinamizatuko du tailerra, OMNIAko kide eta Participacionvirtual.com enpresako zuzendari nagusia den Alvaro Barriosekin batera.
Hirugarren eta azken zita hilaren 27an izango da, eta hiritarren parte hartzerako araudiak izango ditu aztergai. Bilboko Udaleko Alkatetzako Kontseilari Delegatua den Andoni Aldekoa eta Fernando Pindado Kataluniako Generalitateko Goi Teknikaria arituko dira dinamizatzaile moduan.
Hiru tailerrak bi zatitan banatuak egongo dira. Lehenego zatian hizlariek gaiari buruzko hitzaldi bat eskainiko dute. Bigarren zatian, aldiz, parte hartzaile guztien arteko mahainguru bat egingo da. Zati bakoitzak ordu eta erdiko iraupena izango du eta bi zatien artean ordu laurdeneko atsedenaldia egongo da. Tailer guztiak Udalbatza Aretoan izango dira, arratsaldeko seietan.
Jardunaldi horietan parte hartzeko ekainaren 20a baino lehen izena ematea eskatu du Udalak, “lan-mahaiak behar den moduan antolatu ahal izateko”. Horretarako Udaletxeko Herritarren Arretarako Zerbitzuarekin kontaktatu behar da, 010 telefonoaren edo beharrenmapa@laudiokoudala.net posta elektronikoaren bidez.