Egindako ez ohiko Udal Osoko Bilkuran adostasun osoa egon da alderdien artean Lamuza Parkeko saneamenduari eta José Matías eta Maestro Elorzako irisgarritasun obrei lehentasuna emateko Foru Aldundiaren aurrean, instituzio honen Lan eta Zerbitzu Foru Plan barruan aurkezteko.
Horrela, Udal taldeek lortu nahi dute kasu hauetan Foru Aldundiak eman ditzakeen diru laguntzarik handienak, hau da, %80. Krisi ekonomikoa dela eta, Laudioko Udalak ezin dio obra hauei aurre egin Arabako Foru Aldundiak ekarpen ekonomiko garrantzitsua egiten ez badu.
José Matías eta Maestro Elorza kaleen arteko lanek 2.890.473,04 euroko balioa dute. Dena den, fase hau lehena besterik ez da. Zubiko Kurajoko saneamendu arazoak konponduko duen bigarren fasea etorkizunean egin beharko da.
Lamuzako Parkeko saneatze obrek 1.266.034,51 euro balioko dute eta Zumalakarregi etorbideraino luzatuko dira.
Zor historikoak
Alderdi ezberdinek bat egin zuten eta bi proiektu hauek zor historikoa bihurtu direla adierazi zuten. Alde batetik, José Matías eta Maestro Elorzako pasabidea zabaltzeko asmoa pasa den Udal Osoko Bilkuran berretsi zen Latiorroko auzokideen eskaerak jaso eta gero. Bestalde, Lamuzako onbideratze proiektua Foru Aldundiak egin behar zuen bere kabuz hasiera batean, baina zailtasun ekonomikoak agertu ziren eta asmoz aldatu zuen Arabako erakundeak.
Bukatzeko, oposizioan dauden alderdiek gogoratu zioten Udal taldeari Zubiko Kurajoko saneamendu obrak ezin direla ahaztu eta nahiz eta une hauetan ezinezkoa den lehentasuna ematea, Udalaren betebeharra dela erakunde ezberdinetan -Eusko Jaurlaritzan, adibidez- proiektu hori gauzatzeko iturri ekonomikoak bilatzea.