Laudion, OMNIAk adierazi duenez, 6 familia daude etxe kaleraketa arriskuan bere hipotekak ezin dituztelako ordaindu. Hori dela eta, Laudioko Udalak erabaki aitzindari bat hartu du gaur egin den Udal Osoko Bilkuran.
Gaurko testuak, hasiera batean OMNIAren eta PSEren ordezkariek landu zuten, baina alderdi guztien babesa jaso du. Adostasun honi esker, sei neurri jarriko ditu martxan. Haien artean, bi dira garrantzitsuenak: Udalak bitartekari lanak egingo ditu sendi eta banketxeen artean, batik-bat, azkenengo hauek praktika onen kodea bete dezaten. Bestalde, protokolo bat ezarriko du udalak muturreko egoera hauei aurre egiteko.
Protokolo honek botatze arriskuan egon daitezkeen pertsonak laguntzea izango du helburu. Horretarako, giza-zebitzuak erabiliko dira informazioa, ahoulkilaritza eta bitartekaritza eskaintzeko. Aldi berean, beste elkarteekin -Stop Desahucios, ADICAE, AUSBANK...- lan egiteko balio beharko du eta beharrezkoa izango balitz, harrera plan bat hedatu beharko du.
Gainontzeko puntuak
Mozioak jasotzen dituen gainontzeko edukiek udalaren gaitasunak gainditzen dituzte, baina, hala ere, adostu egin dira. Besteak beste, Laudioko Udalak Espainiako Gobernuari eskatuko dio Hipoteka-Legea aldatzea. Aldaketa honi esker sendiek banketxeei etxea eman eta gero zorra bukatutzat ematea nahiko luke tokiko instituzioak.
Gainera, praktika onen kodea ez dela nahikoa adieraziko du udalak. Beste esparru batean, Eusko Jaurlaritzari premiatuko zaio horrelako prozesutan parte-hartzeko eta, bukatzeko, Ministro Kontseiluari, bereziki Ekonomia eta Justizia mininisterioei, Biltzar eta Senatu taldeei, Eusko Jaurlaritzari, Eusko Legebiltzarrai eta Stop Desahucios plataformari jakinaraziko zaie adostutako mozioa.