Latiorroko auzkideak kexu agertu dira, berriro ere, jasaten dituzten mugikortasun arazoak direla eta. Nahiz eta duela gutxi tren geltokiko inguruko tunelan obrak egin diren, bertako biztanleek gogoratu dute udalak konpromesu gehiago hartu zituela tren azpitik doan lurpeko pasabidea egokitzeko.
Printzipioz, lan hauek tunelaren zabalera handitu behar dute. Pasa den urtean proiektuari baiezkoa eman zioten Udalean, baina auzokideek aurten martxan jartzea eskatu dute. Zabaleraren kontuaz gain, auzo elkarte honek beste hobekuntza batzuk gauzatzea exijitu ditu; tunelaren sarrera batean dagoen izkina kurbatzea, bere atzean dagoena ikusgarri egiteko, eta geltoki alboan dagoen horma desagertaraztea, oztopo honekin tunela luzeagoa dela ematen baitu.
Biztanle gehiago ditu Latiorrok
Latiorroko Auzokide Batzordeak gaur egun oraindik funtsezkoak diren lurpeko pasabidea hauek oso zaharrak direla azpimarratu du. Hirurogei urte pasa dira azpiegitura hauek eraiki zirenetik eta bere garaian 400 auzokide baziren, gaur egun 4.000 dira, batzorde honek esan duenez.
Gainera, Laudioar orok erabiltzen dituzten azpiegitura ugari daude Latiorron, hilerria edo futbol zelaia, adibidez. Horrek eragiten du oinezko askok lurpeko pasabidea zeharkatzea. Auzokideen ustez, aldaketa hauei egokitzeko, tunelaren ezaugarriak eraldatu behar dira ahalik eta lasterren.