OHZren eta gainbalioaren zergak eta establezimenduak irekitzeko lizentzia tasak jaitsiko dituzte
Balore katastral berrien inguruan informatzeko aukera izango dute Laudiarrek. Datorren ostegunerako hitzaldia antolatu baitu Udalak, balore horien aldaketek dakartzaten ondorioak azaltzeko. Zita arratsaldeko zazpietan izango da, Lanbide Heziketa Udal Ikastetxearen aretoan.
Ondasun Higiezinen gaineko Zergaren tipoa %0,30tik %0,23ra jaistea erabaki zuen Udalak martxoaren 12ko Osoko Bilkuran. Hala ere, udalak azpimarratu du datozen 8 urteetan tipoa %30an mantendu behar dela. Hortaz gain, errentaren araberako hobari berria egongo dela iragarri du. Hobari berri horretaz baliatu ahal izango diren familiak 21000 eurotik beherako errenta jasotzen dutenak izango dira.
Zatika ordaintzeko aukera egongo dela gaineratu du Udalak. Herritarrek zerga urtean zehar hiru zatitan ordaintzeko aukera izango dute. Ordainketa mota hori eskatzeko epea martxoaren 31an bukatuko da.
Bestelako zergen jaitsiera
OHZaz gain, gainbalioari dagokion zerga eta establezimenduak irekitzeko lizentzia tasak jaistea erabaki da Osoko Bilkuran. Hala, gainbalioari dagokion zerga %14,5etik %5era jaitsiko da eta establezimenduak irekitzeko lizentzia tasak %1etik %0,30ra.