Parte hartzaile guztiek 500 euro jasoko dituzte gutxienez
Idi-proben XLII. torneoa antolatu du Berrio kirol elkarteak Dolumin Barikuaren harira. Gaur emango zaio hasiera norgehiagokari, gaueko bederatzietan. Berritxu, Zalla eta Usurbileko idi pare bana lehiatuko dira.
Torneoak igandean jarraituko du, arratsaldeko seietan, Orio, Zalla eta Bermeoko idien parte hartzearekin. Dolumin Barikuan, aldiz, Zeanuri, Zumarraga, Bakio, Lasarte eta Iruzubietako idiak ikusi ahal izango dira harriak arrastatan eramaten, arratsaldeko zazpietatik aurrera. Txapelketari apirilean emango zaio amaiera. Hilaren batean Orio, Urretxu eta Berritxuko idiak arituko dira arratsaldeko seietatik aurrera. Hurrengo egunean, baina, zita bederatzietan izango da, Hernani, Eibar eta Elgoibarreko idien parte hartzearekin.
Froga guztiak San Rokeko Udal Carrejoan egingo dira. Idi guztiak hasiberriak dira, inoiz lehiatu gabekoak. Torneo honen bidez txapelketetan aritzeko gai diren ikusi ahal izango da.
Sariak
Lehenengo postuan geratzen denak 1300 euro jasoko ditu, txapela eta garaikurrarekin batera. Bigarrena 1200 eurorekin sarituko dute, hirugarrena 1100 eurorekin, laugarrena 1000rekin, bosgarrena 900rekin, seigarrena 800rekin, zazpigarrena 700rekin eta zortzigarrena 600rekin. Gainontzeko parte hartzaileei, aldiz, 500 euro emango zaizkie gutxienez.