Tomas Acha S.L.ko langileek 75 egun greban bete berri dituzte eta ia bi hilabete hauetan gorabehera ugari bizi izan dituzte. Martxoaren 8an Administrazioak ez zuen onartu enpresako zuzendaritzak aurkeztutako EREa, alde batetik, enpresako buruek langileen ordazkeraiei ez dietelako entzunaldirik eman, eta bestalde neurri hori justifikatzen duen daturik ez dutelako erraztu. Legeak bi baldintza horiek derrigorrrez bete behar direla dio.
Mobilizazio gehiago iragarri dituzte greban dauden langileek
Erabaki honek indarberritu egin du pil-pilean dagoen lan gatazka hau. Grebalariek kanpaldi bat egingo dutela iragarri zuten atzo Gasteizen emandako prentsaurrekoan, eta horretarako baimena eskatu diotela Udalari. Neurri hau dinamika zabalago batean kokatu behar da. Berez, langileek egunero ordu erdiko bi elkarretaratze egiten baitituzte Laudion, 13:00etan eta 17:00etan, hain zuzen ere.
Mobilizazio hauek sinadura bilketa batekin eta martxoaren 22rako antolatu duten manifestazioarekin osatuko dituzte. Antolatzaileak manifestazioa otsailean egindakoa baino jendetsuagoa izatea espero dute.
Lan gatazka honen historia
Grabalarien aldarrikapenak bi arrazoietan oinarritzen dira: alde batetik enpresak zor dizkien soldatak behingoz ordaintzea, eta bestetik zuzendaritzak plan industrial egoki bat aurkeztea.
Langileen esanetan, gatazka 2011n hasi zen. Pasa den urtearen hasieran euren soldatetan %25eko murrizketa onartu zuten enpresak zituen estutasun ekonomikoak zirela eta. Hilabete batzuk geroago, soldatak kobratzeko zailtasun gero eta handiagoak izan zituzten. Aldi berean, Tomas Acha S.L.ko zuzendaritzak 62.400 euroko inbertsioa egin zuen Tomas Acha Cargo S.L. enpresa berria sortzeko.
Egoera honen aurrean, langileek greba mugagabeari ekin zioten 2012ko urtarrilaren 2an. Greba hasi bezain lastet enpresako zuzendaritzak langile bati disziplinazko espediente bat ireki zion eta segidan kalera bota zuen. Hamar egunen buruan, enpresak kaleratua zeudela jakinarazi zien beste zazpi langileei. Zazpi horietako bi ordezkari sindikalak ziren.
Urtarrilaren 13an ELA sindikatuak PRECOren bitartekaritza eskatu zuen gatazka honetan esku hartu zezan, Tomas Acha S.L.ko zuzendaritzak sindikatuaren ordezkarien zilegitasuna ukatzen zuelako, eta beraz, ez zegoelako negoziaziorako tarterik. Urtarrilaren 24an PRECOk lan gatazka hau konpontzeko eskaintza bat egingo zuela adostu zuen, baina enpresak ERE bat aurkeztu zuen. Martxoaren 8an, Administrazioak ukatu egin zion lan erregulaziorako espedientea.
ELA sindikatuko militanteen atxiloketak
Atzo eskainitako prentsaurrekoan langileek ELAko zuzendaritzako hainbat kideren babesa jaso zuten. Hauen iritziz, Tomas Acha S.L. enpresaren jarrera erabat gaitzesgarria da.
Beharrezkoa da gogora ekartzea lan gatazka honen harira ELAko lau militante atxilotu zituela Guardia Zibilak. Iñigo Egiguren, sindikatuaren Laudioko kideak adierazi zuen enpresak jarritako salaketa indargabetzen saiatuko direla, bere esanetan salaketa faltsua delako.
Aldi berean, Oscar Navaridasek aitortu zuen atxiloketak gertatu ziren egunean gatazkan inplikatuak zeuden langileak ez zeudela ELAko egoitzan, sindikatuak azpijoko baten susmoa zeukalako.