Laudio Memoria herri ekimenak mozio bat aurkeztuko du martxoan egingo den ohiko Udal Osoko Bilkuran. Testu honen bitartez Guda Zibilan zehar altxamendu militarraren kontra borrokatzen herrian hil ziren miliziano eta gudariak gogoratu nahi dituzte.
Talde politiko gehienen adostasuna lortu du Laudio Memoriak. Ekimena beste ekintza batek osatuko du. Faxismoaren aurka borrokatzen beren bizitzak eman zituzten 35 pertsona hauen izen guztiak plaka batean jaso nahi dituzte, apirilean kalean ipintzeko asmoarekin.
Laudio Memoriak berreskuratu nahi du, jarduera umil honi esker, urte guzti hauetan ahaztuta egon diren borrokalari hauen oroimena.
Hitzaldian iragarri zen
Guzti hau joan den ostiralean adierazi zuten taldekideek, Iñaki Egaña eta Joxean Agirreren hitzaldia hasi baino lehen. Bi pertsona hauek Euskal Memoria proiektuan daude murgilduta eta Laudio Memoriarekin elkarlanean egongo dira.
Aldi berean, Laudioko taldeak erabiltzen duen lan metodologia zorrotza azaldu zuen, agiri ofizialetan oinarrituta baitaude egiten dituzten ikerketa guztiak.