ELAko lau militante atxilotu zituen Guardia Zibilak ostiralean, sindikatuak Basaurin duen egoitzan. ELAk ezagutzera eman duenez, Benemeritak estortsio delitu bat leporatu die sindikalistei.
Dirudienez, atxiloketak Tomas Acha S.L. enpresan eman den lan-gatazkarekin harremana dute. Gatazka hau pil-pilean egon da azken aste hauetan Laudion. Langileek, beste hainbat aldirrakapenekin batera, enpresak zor zizkien soldatak eskatzen zituzten. Akordio batera heldu eta gero, 15 langilek kontratua desegitea onartu zuten. Enpresako ordezkariek langile hauei eman beharreko dirua ELAk Basaurin daukan egoitzan utzi behar zuten.
Enpresariak baina, ez ziren ELAko egoitzara bakarrik joan. Sindikatuak dioenez, ordezkariak kalez jantzitako Guardia Zibil batzuekin joan ziren eta dirua eman eta gero, poliziek langileen ordezkariak atxilotu zituzten. Estortsioa leporatu eta gero, Gasteizera eraman zituzten. Dagoeneko aske geratu dira atxilotuak.
Neurri hau sindikatuaren jarduera kriminalizatzeko saiakera bat dela adierazi du ELAk. Sindikatuak bere kideengan konfidantza guztia duela ziurtatu du eta kasu hau abokatuen esku utzi duela esan du ere. Ez soilik afiliatuak defendatzeko, baita beren ohorea eta erakunde sindikalaren izan ona berreskuratzeko helburuarekin.