Atzo Laudion egin zen Udal Osoko Bilkuran tokiko gaiak ez ziren gehiegi landu. Tomas Acha enpresako langileen mozioaz aparte eta aurrera atera zen Berdintasunaren aldeko 2. planaz gainera, eztabaidatu ziren gainontzeko testuen ardatza, gehien bat, politika orokorra izan zen.
Bilduk sektore publikoaren erreformaren aurkako testu bat aurkeztu zuen. Mozio honetan lan-eskaintza publikoa bertan behera utzi duen neurriaren aurka eta pribatizazioaren aurka azaldu zen koalizio independentista. Mozioa bere bozkekin bakarrik onartu zen, gainontzeko taldeak absteintu ziren eta PPk aurka egin zuen.
EAJk "opor fiskalak" deituriko diruaren zati bat udaltxetara itzultzea eskatu zuen mozio baten bitartez. Europan epaitegiek erabaki zuten enpresei emandako diru laguntza hauek legez kanpokoak zirela, beraz, enpresek jasotako dirua bueltatzen ari dira. Diru horren zati bat, EAJren ustez, udaletxei dagokio. Beraz, testu bidez Arabako Foru Aldundiari diru kopuru hori eskatu zioten EAJk, Bilduk eta OMNIAk. PP eta PSE abstenitu ziren.
Aipatzekoa da momentu horretan Foru Aldundiko Biltzarrean EAJk daukan taldea akordio batera heldu zela zentzu horretan beste taldeekin.
Lan erreforma eta Kexaako arte-lanak
Esparru lokalean eragina daukan arren, politika orokorra berriro agertu zen Bildu eta PSEk proposatu zuten lan erreformaren aurkako mozioan. Testu honetan gogor kritikatu zuten Mariano Rajoyren gobernuak egindako aldaketak. Batik-bat, langileen aurkako erreforma bat delako, lanpostu berririk ez dituelako sortuko eta negoziazio kolektiboaren aurkako eraso bat delako. PSE eta Bilduren bozkekin aurrera egin zuen testuak.
Erregu eta galderak heldu baino lehen, PSEk Kexaako Monastegiak Diocesanas Museoari utzitako arte-lanen egoera jarri zuen mahai gainean. PSEren iritziz, 45.000 euro jartzen ditu Laudioko Udalak Aiaraldean turismoa sustatzeko eta horregatik arte-lan horiek Kexaako monastegira bueltatzea eta baldintza egokietan egitea bermatu behar da.
Gainontzeko taldeek, Aiarako Udalak kudeatu behar duela defendatu zuten eta, beraz, mozioak ez zuen aurrera egin.
Bukatzeko, talde ezberdinek galdera eta erregu batez ere teknikoak egin zizkioten Bilduri.