Udalak kudeatzen dituen zergak hiruhileko bakoitzaren bukaeran ordaindu ahal izango dituzte herritarrek
Zergen ordainketa zatikatua egiteko aukera jarri du martxan Laudioko Udalak. Hemendik aurrera, honako zerga hauek hiruhilero ordaindu ahal izango dituzte laudiarrek: Hiri eta landa-ondasun higiezinen zerga, zarama bilketa zerbitzuarena, Ekonomi Jardueren gainekoa eta Udal hilerriko zerbitzuagatik ordaindu beharrekoa.
Bestelako zerga batzuk, baina, ezingo dira zatika ordaindu. Trafikoarena bezalako zerga aldakorrak eta kontsumoarekin lotutakoak, adibidez; hauek zatika ordaintzeak kudeaketa arazoak lortu ahal dituelako, udalaren arabera.
Egitasmoan parte hartzeko, herritarrek inprimaki bat bete beharko dute martxoaren 31a baino lehen. Inprimakia udaletxeko beheko solairuan eskuratu daiteke. Hala ere, egitasmoan parte hartzeak ez du esan nahi beti zatika ordaindu beharko denik. Herritarrak aurreko sistemara edozein momentutan itzuli ahal izango dira. Hortaz gain, zatikako ordainketa ze zergari aplikatu aukeratu ahal izango dute herritarrek.
Zatikako ordainketak hiruhileko bakoitzaren bukaeran egingo dira eta gutxienez 50 eurokoak izan beharko dute. Sistema berri honek ez du interes gehigarririk sortuko. Hala, ez die ez udalari ez herritarrei gasturik suposatuko, kasuz kasu aztertuko diren sabuespenak egon daitezkeen arren.
Zatikako ordainketaren egitasmoa Bilduk aurkeztu zuen abenduaren 26ko Udal Osoko Bilkuran, eta aho batez izan zen onartua udal-talde politiko guztiengatik.