Prentsa ohar baten bitartez Laudioko EAJ/PNV Uri Buru Batzarrak berriro ere salatu du, bere ustez “egungo udal gobernuaren ageriko ezintasuna”. Idazki honetan Laudioko EAJk Bilduren gobernuak hartu dituen hainbat erabak kritikatu ditu -ZUINaren gastua hirukoiztea, adibidez- eta berehala lanean has dadila eskatu dio.
Jeltzaleek zehaztu dute zeintzuk diren, euren iritziz, Udalaren betebeharrak: “enplegua sortuko duten politikak gara ditzala, langabetuei prestakuntza eskaini diezaiela, Herri Antolamendurako Plan Nagusiaren berrikuspena amai dezatela, Ugarteko biribilgunea eta Goikoplazako etxebizitzak eraiki ditzaten utz dezatela, San Joaneko errekaren bideratzea egin dadila, Lamuza Parkeko zaharberritze osoa has dadila, Hornidura plaza eraberritu dadila, Villosako zubia konpon dadila… erabaki guztiak ere ez dezatela Ondasun Higiezinen Zergaren igoera eskandalagarri bat eragin eta auzoen eta Laudioko herritarren espazio eta ekipamendu publikoen beharrei erantzuna eman diezaiela".
Gizarte zerbitzuak eta erroldatzeen erregularizazioa
Era berean, Laudioko EAJk azalpenak eman ditu azkenengo udalbatzan aurkeztutako eta aurrera ateratako proposamenaz. Oinarrizko gizarte zerbitzuen lanbiderako transferentzia eta erroldatzeen erregularizazioa dela eta, alderdiak proposatu zuen Gizarte Ongizate Saileko funtzionarioek beste lan batzuk bete ditzatela: lan pedagogiko eta informatibo bat egitea giza-laguntzen inguruan, gizarte larrieldietarako laguntzen titular eta onuradunen segidako jarraipen eta kontrola betetzea eta laguntza hauek kobratzen dituzten pertsonen partetik irregulartasunik egonez gero, oinarrizko Udal Zerbitzuek Udaltzaingoen laguntza jasotzea.