Erreketan zaborra metatzen dela salatu zuten Auzo Asanbladan parte hartu zuten hainbat herritarrek
Erreken garbiketa sakon bat eskatu dute hainbat Laudioarrek ospatu berri diren auzo asanbladetan. Eskaera hori Ugarteko Auzo Asanbladan nagusitu da. Ugarteko bizilagunek adierazi dute auzoa zeharkatzen duen erreka-zatian zaborra pilatzen dela eta horrek oso sentsazio desatsegina sorrarazten duela. Ugarteko Futbito Torneoa jokatzen denean zabor metaketa handitzen dela gaineratu zuten auzokideek.
Ugarteko bizilagunek ez-ezik, Erdigunekoek ere euren deserosotasuna azaldu zuten Laudioko Erabilera anitzeko gelan egindako asanbladan. Erosketetarako gurditxoak, botellonaren arrastoak, trafiko seinaleak… horrelako gauzak topatu daitezke errekan, herritarren arabera. Ur fekalak dira, baina, kezkarik nagusiena; oso usain bortitzak sorrarazten dituztelako. Horregatik, aldaketak egin nahi ditu udalak ur horien ibilbidean, errekako korrontearen norabide berean joan daitezen. Hala ere, udalak ezin dio bere kabuz irtenbide bat eman zaborraren arazoari, Eusko Jaurlaritzaren konpetentzia bat delako.