Bihar eskainiko dute kontzertua, gaueko hamaiketan
Aurtengo Laudioko Jaietan estreinatu den Pirulo Monster Txou ikuskizuna berriz ikusteko aukera egongo da bihar, Laudioko Antzokian, gaueko hamaiketan. Abestiak jaietan aurkeztutako berdinak izango diren arren, ikuskizunaren formatua aldatu egingo da, Iñaki Moskoso Pirulo Txouko abeslariaren arabera. “Beste buelta bat emango diogu ikuskizunari”, dio abeslariak.
Moskosok adierazi du Berakatz Egunean eskainitako ikuskizunarekin “pozik” geratu zirela, nahiz eta soinua ona ez izan soinu ekipoa zela eta. “Ahotsa oso garbi entzuten zen, baina instrumentuak oso baxu entzuten ziren”. Hala, biharko ikuskizunean soinu hobeagoa izatea espero dute.
Laudioko Antzokian jotzen duten 6. aldia izango da biharkoa. Eta Pirulo Monster Txou ikuskizuna leku gehiagotan aurkezteko asmoa dute, nahiz eta oraindik ezer loturik ez izan. 2012ko Pirulo Txoua prestatzeari ekingo diote gainera. “Irailean hasiko gara gure ideiei forma ematen”, dio Moskosok.
Pirulo Txou ikuskizuna Jose Luis no me mires con el Ojo de Cristal talde laudiarrak antolatzen du Canal 58rekin batera. Abesti ezagunei letra aldatzen diete, Laudiorekin zerikusia daukaten gaiak umoretsuki jorratuz. Abestiak esketx, bideo, bakarrizketa eta abarrekin tartekatzen dituzte, “Humor Radical Basto” delakoa baliatuz. 20 urte baino gehiago eman dituzte taula gainean