Laudion meskita bat irekitzeko asmoa duen Al Wafaa elkarteak antolatu du ospakizuna
Sakrifizioaren eguna ospatu zuten atzo eskualdeko musulmanek. Ekitaldia Al Wafaa elkarteak antolatu zuen Laudion, Gardea auzoko frontoian. Laudio, Amurrio eta Urduñako ehunka musulman hurreratu ziren bertara.
Goizeko zortzietan eman zitzaion hasiera ospakizunari. Sortzailea inbokatu ostean, Salata (Otoitza) eta Khutba (Hitzaldia) egin zituzten bertaratutakoek. Biak ala biak Bilboko imam (otoitz kolektiboa zuzentzen duen pertsona) baten gidaritzapean burutu zituzten. Imanaren hitzen ostean, parte hartzaileek hamaiketakoa izan zuten.
Auzokide, agintari eta komunikabideei ere bertaratzeko gonbidapena luzatu zien Al Wafaa elkarteak. Hala, bertan izan ziren OMNIA udal talde politikoko ordezkariak. Iraneko telebistako kazetari batzuk ere bertaratu ziren, musulman bihurtu diren mendebaldeko biztanleen inguruko erreportaje bat grabatzeko.
Musulman euskaldunak
Gardeako frontoian egondako musulmanak jatorri eta kultura ezberdinetakoak dira. Gehienak marokoarrak izan arren, Saharatik, Algeriatik, Pakistanetik edo Txetxeniatik etorritako immigranteak ere egon ziren bertan; eta baita euskaldunak diren bi musulman ere. Horietako bat Othman Alfredo Gómez-Cambronero da, Al Wafaa elkarteko kidea. Alfredo “pozik” azaldu zen deialdiak jasotako harrerarekin eta mota honetako ekitaldiek “musulmanen komunitatea indartzen” dutela adierazi zuen.