Erabilera Anitzeko Aretoaren proiektua garai ekonomiko egokiago batera iritsi arte atzeratuko da
Latiorroko Erabilera Anitzeko Aretoa eraikitzeko erabiliko zen eremua urbanizatzea erabaki du Udalak. Altzarratzeko orubean kokatutako lursail hori hesituta dago, aretoa bertan eraikitzeko asmoa zegoelako. Proiektu hori atzeratu egin denez, eremua Kamaraka kalearekin lotzea erabaki du Udalak, zonalde guztia urbanizatuz.
Kultura Ministerioak aretoa eraikitzeko eman zituen 400.000 euroak urbanizazioa gauzatzeko erabiliko ditu Udalak. Hori burutzeko egin beharreko obrak 2012. urtea hasi baino lehen egon behar dira bukatuak, baldin eta Ministerioak jarritako epeak beteko badira.
Txaro Sarasua PSE-EE alderdiko zinegotziak bere “poztasuna” adierazi du hartutako erabakiaren aurrean. Bozeramaile sozialistak behin baino gehiagotan helarazi dio Udalari arekoaren eraikitzea etenda egon bitartean zonaldea urbanizatzearen proposamena. Estatutik datorren diru guztia “erabili” behar dela esan du Sarasuak.
OMNIA, aldiz, ez da erabakiarekin hain konforme agertu. Plataforma horren arabera, urbanizatzeak gastu asko suposatuko du egungo egoera ekonomikoari erreparatuta. “Gure indarrak Kultur Etxea eta Lanbide Heziketa Udal Ikastetxeko zinema hobetzen jarri beharko genituzke”, esan du Nerea Gonzalez OMNIAko zinegotziak.
OMNIA izan da erabakia begi onez hartu ez duen udal-talde bakarra.